April 18, 2024
తాజాగా నల్గొండలోని బైపాస్‌ రోడ్డుపై ఘోర ప్రమాదం జరిగింది. టాలీవుడ్ ప్రముఖ నటుడు, కమెడియన్ అయిన రఘుబాబు ప్రయాణిస్తున్న కారు ప్రమాదవశాత్తూ ఒక బైక్‌ని ఢీకొట్టగా ఈ ప్రమాదంలో ఆ వ్యక్తి అక్కడికక్కడే మృతిచెందాడు. అయితే మృతుడు నల్గొండ పట్టణ బీఆర్ఎస్ ప్రధాన కార్యదర్శి సందినేని జనార్దన్‌రావుగా పోలీసులు గుర్తించారు. నటుడు రఘుబాబు కారు బైకును ఢీ కొట్టడంతో పాటు దాదాపు 50 మీటర్ల దూరం లాక్కెళ్లినట్లు ప్రత్యక్ష సాక్షులు చెప్తున్నారు. ప్రమాదంపై కేసు నమోదు చేసిన నల్గొండ పోలీసులు దర్యాప్తు చేస్తున్నారు. కాగా నల్గొండ పట్టణంలోని శ్రీనగర్ కాలనీకి చెందిన సందినేని జనార్దన్ రావు 51 బీఆర్ఎస్ పట్టణ ప్రధాన కార్యదర్శిగా పనిచేస్తున్నారు.
తాజాగా ఆయన బుధవారం రోజు మధ్యాహ్నం సమయంలో పట్టణంలోని రిక్షా పుల్లర్స్ కాలనీ వద్ద ఏర్పాటు చేసిన తన దత్త సాయి వెంచర్ నుంచి ద్విచక్రవాహనంపై ఇంటికి వెళ్తున్నారు. అదే సమయంలో నటుడు రఘుబాబు తన కారులో హైదరాబాద్ నుంచి మిర్యాలగూడ వైపు వెళ్తున్నారు. ప్రమాదవశాత్తు రఘుబాబు కారు జనార్దన్ రావు ద్విచక్ర వాహనాన్ని బలంగా ఢీ కొట్టింది. ఈ ప్రమాదంలో జనార్దన్ రావుకు తీవ్ర గాయాలు కాగా స్పాట్‌లోనే మృతి చెందాడు. ఇక జనార్దన్ రావు భార్య నాగమణి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు. జనార్దన్ రావు స్వస్థలం నకిరేకల్ మండలంలోని మంగళపల్లి గ్రామంగా పోలీసులు తెలిపారు.
జనార్దన్ రావుకు భార్య నాగమణి.. ఒక కుమార్తె, ఒక కుమారుడు ఉన్నారు. ప్రమాదం అనంతరం రఘుబాబుతో స్థానికులు మాట్లాడిన వీడియో ఇప్పుడు వైరల్‌గా మారింది. ద్విచక్ర వాహనం మీద వచ్చిన వ్యక్తి ఎటువైపు నుంచి వచ్చాడు.. ఎలా ప్రమాదం జరిగింది అని రఘుబాబుతో స్థానికులు మాట్లాడారు. అయితే.. ఈ వీడియోలో రఘుబాబు ఆందోళనగా కనపడగా పక్కన ఉన్న వ్యక్తులు నీళ్లు తాగమని సూచిస్తున్నారు. మీదేం తప్పు లేదు ఆయనదే తప్పుందంటూ వివరించారు. కాగా ప్రస్తుతం ఇదే విషయం టాలీవుడ్ ఇండస్ట్రీలో హాట్ టాపిక్ గా మారింది.
Read More: సిద్దార్థ్‌కి స్పెషల్ గా బర్త్డే విషెస్ చెప్పిన అదితి.. పోస్ట్ వైరల్?
