December 21, 2021
ఫిదా సినిమాతో కుర్రకారు గుండెల్లో గిలిగింతలు పెట్టింది సాయి పల్లవి. ఆ సినిమాతో ఏకంగా స్టార్ హీరోయిన్ స్టేటస్ అందుకుని తెలుగులో కూడా మోస్ట్ వాంటెడ్ హీరోయిన్ అయింది. ఈ ఏడాది ఇప్పటికే లవ్స్టోరీలో నటనతో, డ్యాన్సులతో ఆకట్టుకుని ఇప్పుడు శ్యామ్ సింగరాయ్తో మరోసారి ప్రేక్షకుల ముందుకు రాబోతుంది. నాని హీరోగా నటించిన ఈ చిత్రానికి ట్యాక్సివాల ఫేమ్ రాహుల్ సాంకృత్యాన్ దర్శకుడు. వెంకట్బోయినపల్లి నిర్మాత. ఈ నెల 24న థియేటర్స్కి రాబోతున్న సందర్భంగా సాయి పల్లవి మీడియాతో ముచ్చటించింది.
దర్శకుడు ఈ కథతో మిమ్మల్ని అప్రోచ్ అయినప్పుడు మీకు ఏమనిపించింది? – ప్రతి మూవీ నాకు నమ్మకం కలిగాకే చేస్తాను. అలాగే స్క్రిప్ట్ చదివేటప్పుడు ‘సినిమా ఇలా ఉంటుంది, నా పాత్ర అలా చేయొచ్చు’ అని ఒక ఐడియా వస్తుంది. చిన్నప్పుడు మనం చరిత్ర చదువుతున్నప్పుడు ఈ క్యారెక్టర్ ఇలా ఉంటుంది అని ఊహించుకుని ఉంటాం. స్క్రిప్ట్ చదివేటప్పుడు దేవదాసి క్యారెక్టర్ ఎలా చేయాలి అనేదాని కంటే వాళ్ల సైకాలజీ ఎలా ఉంటుంది అని చెప్పడం నచ్చింది. వేరే సినిమాలతో పోలిస్తే ఈ సినిమాను సైకాలజీ పరంగా చేశాను.
చాలా స్ట్రాంగ్ క్యారెక్టర్ అయితేనే సాయి పల్లవి ఓకే చేస్తుంది అంటారు నిజమేనా? – అలా ఏం లేదండి! అవన్ని నేను నమ్మి చేశాను..మీకు కూడా నచ్చినందుకు చాలా హ్యాపీగా ఉంది.
డాన్స్ మీకు, ఈ సినిమాలో మీ పాత్రకు ప్లస్ అనుకుంటున్నారా? – నేను డాన్స్ ఎక్కువ చేసింది ‘లవ్ స్టోరీ’లోనే అనుకుంటా..ఈ సినిమాలో డాన్స్ ఎంత కావాలో… అంతే పెట్టారు. నాకు క్లాసికల్ డాన్స్ రాదు. ఇప్పటి వరకు నేర్చుకోలేదు. నేను చేయగలుగుతానని రాహుల్ నమ్మారు. నాతో పాటు పాటలో క్లాసికల్ డాన్స్ చేసిన వారు చాలా ఎక్స్పీరియన్స్ ఉన్నవాళ్లు. ఆ పాటకు డాన్స్ చేసేటప్పుడు చాలా భయపడ్డాను. వాళ్లతో ఒకేలా చేశానని అంటే అదే పెద్ద సక్సెస్ అనుకున్నాను.
దేవదాసి పాత్ర గురించి ఏమైనా రీసెర్చ్ చేశారా? – దేవదాసి వ్యవస్థ గురించి పాఠశాలలో చదివా. దేవదాసీలు ప్రారంభంలో దేవుడికి సేవకులుగా ఉన్నాయి. తర్వాత తర్వాత దాన్ని మార్చేశారు. వాళ్ల గురించి పూర్తిగా చూపించలేదు మా సినిమాకు ఎంత కావాలో అంతే తీసుకున్నాం. ‘శ్యామ్ సింగ రాయ్’ పాత్రతో పాటు ఎంత చూపించాలో, అంతే చూపించారు. ఇది దేవదాసి వ్యవస్థపై సినిమా కాదు.
దేవదాసి పాత్ర పరంగా ఏమైనా పరిమితులు పెట్టుకున్నారా? – రిస్ట్రిక్షన్స్ ఏమీ లేవు. స్క్రిప్ట్ చదివే సంతకం పెడతాం కదా… సంతకం చేసిన తర్వాత అలా అంటే బావుండదు.
‘శ్యామ్ సింగ రాయ్’ వేడుకలో మీ క్రేజ్ చూసి ఆనందంతో కన్నీళ్లు పెట్టుకున్నారు..? – అది కృతజ్ఞత. అది మాత్రమే కాదు…ఆ పాట అనురాగ్ కులకర్ణి పాడారు. డాన్స్ చేశారు. మనం ఒక కళను ఎంజాయ్ చేయడమే పెద్ద ఇది. మనకు ఏమీ రాకున్నా ఎంజాయ్ చేయగలుగుతాం. అదే దేవుడు ఇచ్చిన పెద్ద ఆశీర్వాదం. అవన్నీ చూసి ఎమోషనల్ అయ్యాను. నా బ్రెయిన్ లో నేను మామూలు సాయి పల్లవినే. అయితే…నేను చేసే సినిమాలు చాలామందికి సంతోషం ఇస్తుందంటే ఎమోషనల్ అయ్యాను. నేను రుణపడ్డాను. నాతో సినిమాలు చేసిన దర్శకులు, నిర్మాతలకు… ప్రేక్షకులు అందరికీ థాంక్స్ చెప్పాలని అనుకున్నాను.
ఈ కథతో ఎమోషనల్గా కనెక్ట్ అయ్యారా? క్యారెక్టర్ పరంగానా? – అన్ని మూవీస్కి క్యారెక్టర్కు కనెక్ట్ అయితేనే స్క్రీన్ మీద యాక్టింగ్ బావుంటుంది అనిపిస్తుంది. లేదంటే డిఫరెన్స్ తెలుస్తుంది. ఈ సినిమాలో సాయి పల్లవి కనిపించదు..దేవదాసి పాత్రే కనపడుతుంది.
నానితో మీకు రెండో సినిమా ఇది. ఆయనతో వర్కింగ్ ఎక్స్పీరియన్స్? – ‘ఎంసీఏ` టైమ్లో నాకు, నానిగారికి సన్నివేశాలు తక్కువ. సినిమాలో 20-30 పర్సెంట్ మాత్రమే ఉంటాయి. అందుకని నేను ఎలా ఉంటానో…అందులో అలాగే ఉన్నాను. నానిగారు కూడా అంతే! డిఫరెంట్గా ఏమీ ట్రై చేయలేదు. ‘శ్యామ్ సింగ రాయ్’లో మా క్యారెక్టర్స్ వేరేలా ఉన్నాయి. మా ఇద్దరి మధ్య వచ్చే సన్నివేశాలు ఇంకా కొంచెం డీప్గా ఉన్నాయి. అప్పుడూ, ఇప్పుడూ సేమ్ కంఫర్ట్. ఈ క్యారెక్టర్స్ కోసం మా మధ్య ఎక్కువ డిస్కషన్స్ ఉన్నాయి.
మీకు యాక్టింగ్, డాన్స్, మెడిసిన్ అంటే ప్యాషన్ అని తెలుసు. అదే విధంగా ఇంకో అంశం ఏదైనా ఉందా? ఎందులో ప్యాషన్ ఉంది? – నాకు నా గురించి తెలుసుకోవాలని ఉంటుంది. యాక్టింగ్, డాన్స్, మెడిసిన్ కాకుండా మెడిటేషన్ చేయాలని అనుకుంటున్నాను. ఎందుకంటే… నా గురించి, పరిస్థితుల గురించి లోతుగా ఆలోచించాలని అనుకుంటున్నాను. నా గురించి నేను మరింత తెలుసుకోవాలి అనుకుంటున్నా..
రాహుల్ మేకింగ్ గురించి చెప్పండి? – చాలా క్లారిటీతో సినిమా తీశారు. ఈ కథకి ఏం కావాలి ఏం వద్దు అనేది ఆయనకు పూర్తిగా తెలుసు. నాని, నేను షూటింగ్ చేసిన ఫస్ట్ సీన్… సినిమాలో మా ఇద్దరి క్యారెక్టర్స్ మధ్య లాస్ట్ సీన్. ఎలా చేయాలో మాకు తెలియలేదు. తను ఇలా చేయండి అని చెప్పారు మేం ఆయన్ని ఫాలో అయ్యాం అంతే…
మీ నెక్స్ట్ ప్రాజెక్ట్స్..? – ‘విరాట పర్వం షూటింగ్ పూర్తయ్యింది.. నా పాత్ర డబ్బింగ్ మాత్రమే బ్యాలెన్స్ ఉంది. తమిళంలో ఓ సినిమా చేశా. అది కూడా త్వరలో విడుదల అవుతుంది. ప్రస్తుతం వెబ్ కంటెంట్ చదువుతున్నా…నచ్చితే తప్పకుండా చేస్తా..