న‌న్ను క‌రిచిన‌పాముతో ఫోటో దిగాను – స‌ల్మాన్‌ఖాన్‌

December 27, 2021

న‌న్ను క‌రిచిన‌పాముతో ఫోటో దిగాను – స‌ల్మాన్‌ఖాన్‌
Salman Khan About Snake Byte:  బాలీవుడ్‌ కండల వీరుడు సల్మాన్‌ ఖాన్‌ పుట్టిన రోజు సందర్భంగా ఈ రోజు ఆయ‌న‌ మీడియాతో ముచ్చటించారు. అందులో భాగంగా నిన్న తాను పాము కాటుకు గురైన విషయంపై కూడా స్పందించారు. ‘‘పాన్వేల్‌లోని నా ఫౌంహౌస్‌ చుట్టూ అటవీ ప్రాంతమే. దాంతో ఇక్కడ తరచూ పాములు తిరుగుతుంటాయి. నా పుట్టినరోజు వేడుకల్లో పాల్గొనేందుకు కుటుంబసభ్యులు, స్నేహితులు శనివారం రాత్రి ఫాంహౌస్‌కు వచ్చారు. ఆదివారం తెల్లవారుజామున ఓ గదిలో పాము కనిపించింది. దాంతో అక్కడున్న వారందరూ ‘పాము పాము’ అని కేకలు వేశారు. తిరిగి అడవుల్లో వదిలేద్దామని దానిని పట్టుకుని బయటకు తీసుకువస్తుండగా.. అది నా చేతిపై మూడుసార్లు కరిచింది. వెంటనే నా కుటుంబసభ్యులు, వ్యక్తిగత సిబ్బంది నన్ను ఆస్పత్రికి తరలించారు. ఆరుగంటలపాటు వైద్యుల పర్యవేక్షణలో ఉన్న తర్వాత నన్ను డిశ్ఛార్జ్‌ చేశారు. ఇప్పుడు నేను ఆరోగ్యంగానే ఉన్నాను. ఇంటికి తిరిగి వచ్చేటప్పుడు ఆ పాము మళ్లీ కనిపించింది. దాంతో ఫొటో కూడా దిగాను. దాన్ని కూడా నా ఫ్రెండ్‌గానే భావిస్తున్నా’’ అని సల్మాన్‌ వివరించారు.
రాజమౌళి గొప్ప దర్శకుడు. ఆయన దర్శకత్వంలో నేను సినిమా చేస్తున్నట్లు వస్తోన్న వార్తల్లో ఎలాంటి నిజం లేదు. ఒకవేళ ఆయనతో సినిమా చేసే ఛాన్స్‌ వస్తే నేనెంతో సంతోషిస్తా. ప్రస్తుతం ‘టైగర్‌-3’, ‘కబీ ఈద్‌ కబీ దివాళీ’ షూటింగ్స్‌లో ఉన్నా. అవి పూర్తైన వెంటనే ‘భజరంగీ భాయిజాన్‌’ సీక్వెల్‌ పట్టాలెక్కించాలనుకుంటున్నా. ఆ సినిమా టైటిల్‌ ‘పవన్‌పుత్ర భాయిజాన్‌’. దీనికి కూడా రాజమౌళి తండ్రి కె.విజయేంద్ర ప్రసాద్‌ కథ అందిస్తున్నారు. ‘నో ఎంట్రీ’ సీక్వెల్‌ కూడా వచ్చే అవకాశం ఉంది’’ అని త‌న త‌దుప‌రి చిత్రాల గురించి వెల్ల‌డించారు.

ట్రెండింగ్ వార్తలు